चित्तौड़गढ़। जिले री कपासन विधानसभा में विकास रा दावा तो घणा हुवे, पण धरातल पर सड़कां री हालत देख र आपरो जीव धूज जावेला। आज बात करां गुमानपुरा सूं उमण्ड वे र करुंकड़ा जावण वाली सड़क री, जकी सड़क तीन साल सूं प्रशासन री बेरुखी रो शिकार है। गुमानपुरा सूं करुंकड़ा तक री सड़क अब सड़क कोनी री, रोड़ माथे मोटा-मोटा कांकरां दिख रह्या। हालत इत्ती खराब है के मोटर साईक्ला चलाबा वाळा अठै फिसल रया है। लारला तीन बरसां सूं इण सड़क री कोई सुध लेवण वालों कोनी। गांव वालां रो कहणो है के स्थानीय विधायक और पीडब्ल्यूडी महकमा ने कई बार अरदास करी। लोग केवे कि नेताजी वोटां रे टेम तो हाथ जोड़े, पण अब जनता री पीड़ा देखण री फुरसत कोनी। सूत्रों सूं ठा पड़्यो है के पीडब्ल्यूडी महकमै सड़क री मरम्ममत रो प्रस्ताव बणा र ऊपर तो भेज दियो, पण बजट री स्वीकृति अभी तक कोनी मिली। सरकारी कागजी कार्रवाई रे चक्कर में आम आदमी रा हाड-गुडा टूट रया है। गांवा रा मिनखां रो धीरज अब टूट रयो है। लोग कह रया है के अगर बेगा ही सड़क कोनी बणी तो अबकी बार वोट री चोट सूं प्रशासन ने जगाया जावेला। ग्रामीण बोल्या के साहब- तीन साल हो गया धूळ फांकता। गाड़ियां रा टायर घिस गया और म्हाका हाडा टूट गया। कागदां में बजट आवे पण सड़क पर कदी कोनी दीखै।
Author: डेस्क/माय सर्कल न्यूज
निष्पक्ष और सच खबर~ आपके पास कोई ख़बर हो तो हमारे डेस्क के नम्बर 92140-30782 पर वीडियो, फोटो समेत ख़बर भेज सकते हैं। या हमें मेल करें- mycirclenews@gmail.com यूट्यूब पर सर्च करें- माय सर्कल न्यूज़